humne chaha tha jinhen shauq se armanon se

ham ne chāhā thā jinheñ shauq se armānoñ se

vo bahāreñ nahīñ vābasta gulistānoñ se

azmat-e-fitrat-e-idrāk badal jaatī hai

kaam bigḌe hue ban jaate haiñ dīvānoñ se

qahqahe dard kī tamhīd bhī ho sakte haiñ

bijliyāñ bhī kabhī Takrātī haiñ kāshānoñ se

maut un ke liye paiġhām-e-baqā hotī hai

khel jaate haiñ jo be-sāḳhta tūfānoñ se

kis qadar past huā fitrat-e-ādam kā vaqār

aaj insān laraz uThtā hai insānoñ se

aur baḌh jaatā hai andāz-e-junūñ kā aalam

jab bhī dīvāne ulajhte haiñ garebānoñ se

mai-kashī naam hai piine kā nigāhoñ se mudām

ham ne piinā nahīñ sīkhā kabhī paimānoñ se

kis qadar fitrat-e-bebāk kī ḳhū badlī hai

azm-e-mahmūd laraztā hai sanam-ḳhānoñ se

ham rahe dahr meñ āzurda-e-sāhil 'ḳhurshīd'

nāḳhudā se kabhī uljhe kabhī tūfānoñ se

hum ne chaha tha jinhen shauq se armanon se

wo bahaaren nahin wabasta gulistanon se

azmat-e-fitrat-e-idrak badal jati hai

kaam bigDe hue ban jate hain diwanon se

qahqahe dard ki tamhid bhi ho sakte hain

bijliyan bhi kabhi Takraati hain kashanon se

maut un ke liye paigham-e-baqa hoti hai

khel jate hain jo be-saKHta tufanon se

kis qadar past hua fitrat-e-adam ka waqar

aaj insan laraz uThta hai insanon se

aur baDh jata hai andaz-e-junun ka aalam

jab bhi diwane ulajhte hain garebanon se

mai-kashi nam hai pine ka nigahon se mudam

hum ne pina nahin sikha kabhi paimanon se

kis qadar fitrat-e-bebak ki KHu badli hai

azm-e-mahmud larazta hai sanam-KHanon se

hum rahe dahr mein aazurda-e-sahil 'KHurshid'

naKHuda se kabhi uljhe kabhi tufanon se