humne dekhe the kabhi KHwab suhane kya kya

ham ne dekhe the kabhī ḳhvāb suhāne kyā kyā

yaad aate haiñ vahī guzre zamāne kyā kyā

dard-e-dil yās-o-alam hasrat-o-armāñ aañsū

dafn haiñ dil ke ḳharābe meñ ḳhazāne kyā kyā

terī yādeñ tirī chāhat tirī furqat tirā ġham

tū ne baḳhshe mujhe rone ke bahāne kyā kyā

dil meñ raushan hī rahe terī mohabbat ke charāġh

āñdhiyāñ aatī rahīñ un ko bujhāne kyā kyā

haiñ vo duniyā kī nigāhoñ meñ ajā.ib-ḳhāne

log bhī chhoḌ ga.e qasr purāne kyā kyā

ahl-e-dil ab bhī taḌap uThte haiñ sun kar un ko

haiñ zamāne meñ mohabbat ke fasāne kyā kyā

dasht-o-sahrā pe hī mauqūf nahīñ hai ham ne

justujū meñ tirī dekhe haiñ Thikāne kyā kyā

sang-bārī se navāzā hai tire shahr ne jab

ro.e haiñ mere liye ā.ina-ḳhāne kyā kyā

yād-e-māzī ne mujhe jab bhī satāyā hai 'zafar'

ek lamhe meñ simaT aa.e zamāne kyā kyā

hum ne dekhe the kabhi KHwab suhane kya kya

yaad aate hain wahi guzre zamane kya kya

dard-e-dil yas-o-alam hasrat-o-arman aansu

dafn hain dil ke KHarabe mein KHazane kya kya

teri yaaden teri chahat teri furqat tera gham

tu ne baKHshe mujhe rone ke bahane kya kya

dil mein raushan hi rahe teri mohabbat ke charagh

aandhiyan aati rahin un ko bujhane kya kya

hain wo duniya ki nigahon mein ajaib-KHane

log bhi chhoD gae qasr purane kya kya

ahl-e-dil ab bhi taDap uThte hain sun kar un ko

hain zamane mein mohabbat ke fasane kya kya

dasht-o-sahra pe hi mauquf nahin hai hum ne

justuju mein teri dekhe hain Thikane kya kya

sang-bari se nawaza hai tere shahr ne jab

roe hain mere liye aaina-KHane kya kya

yaad-e-mazi ne mujhe jab bhi sataya hai 'zafar'

ek lamhe mein simaT aae zamane kya kya