humne dekhe zindagi mein chand aise sar-phire

ham ne dekhe zindagī meñ chand aise sar-phire

dushmanoñ meñ jo payām-e-dostī le kar phire

vaa.e ye taht-e-shu'ūr apnā balā sā ban gayā

apnī āñkhoñ meñ baḌe nādīdanī manzar phire

jab bhī vo aa.e khulī aish-o-tarab kī chāñdnī

din mire zulmat-kade ke is tarah aksar phire

kyā koī shahr-e-tamannā phir ujaḌ kar bas gayā

jābirān-e-vaqt kyoñ ḳhanjar liye ghar ghar phire

shab ko aksar ham-safar thī ThanDī ThanDī chāñdnī

din ko ham jaltā huā sūraj liye sar par phire

niiñd kyā aatī shab-e-hijrāñ ke is māhaul meñ

ham kabhī baiThe kabhī uTThe kabhī uTh kar phire

dam ġhanīmat hai 'jamālī' aap kā is daur meñ

ab zamāne meñ kahāñ haiñ aap jaise sar-phire

hum ne dekhe zindagi mein chand aise sar-phire

dushmanon mein jo payam-e-dosti le kar phire

wae ye taht-e-shu'ur apna bala sa ban gaya

apni aankhon mein baDe nadidani manzar phire

jab bhi wo aae khuli aish-o-tarab ki chandni

din mere zulmat-kade ke is tarah aksar phire

kya koi shahr-e-tamanna phir ujaD kar bas gaya

jabiran-e-waqt kyon KHanjar liye ghar ghar phire

shab ko aksar ham-safar thi ThanDi ThanDi chandni

din ko hum jalta hua suraj liye sar par phire

nind kya aati shab-e-hijran ke is mahaul mein

hum kabhi baiThe kabhi uTThe kabhi uTh kar phire

dam ghanimat hai 'jamali' aap ka is daur mein

ab zamane mein kahan hain aap jaise sar-phire