humne duniya mein ajab tarah ke manzar dekhe

ham ne duniyā meñ ajab tarah ke manzar dekhe

phuul kī shakl meñ aate hue patthar dekhe

jis ne dekhā na ho maiḳhāne kā pur-kaif samāñ

dast-e-sāqī meñ chhalaktā huā sāġhar dekhe

vo nazar tang hai arbāb-e-mohabbat ke liye

bazm-e-jānāñ meñ jo aa kar mah-o-aḳhtar dekhe

jo tasavvur meñ banātā hai hasīñ tāj-mahal

pahle miTTī ke gharauñde to banā kar dekhe

rind to rind haiñ zāhid ba-ḳhudā jhuum ga.e

mai-kade meñ jo khanakte hue sāġhar dekhe

faiz-e-ustād se ḳhālī nahīñ koī shā.ir

yuuñ to mahfil meñ bahut ‘shā.ir’-e-ḳhud-sar dekhe

hum ne duniya mein ajab tarah ke manzar dekhe

phul ki shakl mein aate hue patthar dekhe

jis ne dekha na ho maiKHane ka pur-kaif saman

dast-e-saqi mein chhalakta hua saghar dekhe

wo nazar tang hai arbab-e-mohabbat ke liye

bazm-e-jaanan mein jo aa kar mah-o-aKHtar dekhe

jo tasawwur mein banata hai hasin taj-mahal

pahle miTTi ke gharaunde to bana kar dekhe

rind to rind hain zahid ba-KHuda jhum gae

mai-kade mein jo khanakte hue saghar dekhe

faiz-e-ustad se KHali nahin koi shair

yun to mahfil mein bahut ‘shair’-e-KHud-sar dekhe