humne honTon pe tabassum ko saja kar dekha

ham ne hoñToñ pe tabassum ko sajā kar dekhā

ya.anī zaḳhmoñ ko phir ik baar harā kar dekhā

saarī duniyā meñ nazar aane lage tere nuqūsh

parda jab chashm-e-basīrat se uThā kar dekhā

duur phir bhī na huī qalb-o-nazar kī zulmat

ham ne ḳhuuñ apnā charāġhoñ meñ jalā kar dekhā

apnā chehra nazar aayā mujhe us chehre meñ

is ke chehre se jo chehre ko haTā kar dekhā

vo ta.alluq tirī ik zaat se jo thā mujh ko

us ta.alluq ko bahar-e-hāl nibhā kar dekhā

barf hī barf nazar aatī hai tā-hadd-e-nazar

zindagī ham ne tirī khoj meñ jā kar dekhā

jāvedāñ ho gayā har naġhma-e-pur-dard mirā

mere hoñToñ se zamāne ne churā kar dekhā

hum ne honTon pe tabassum ko saja kar dekha

yani zaKHmon ko phir ek bar hara kar dekha

sari duniya mein nazar aane lage tere nuqush

parda jab chashm-e-basirat se uTha kar dekha

dur phir bhi na hui qalb-o-nazar ki zulmat

hum ne KHun apna charaghon mein jala kar dekha

apna chehra nazar aaya mujhe us chehre mein

is ke chehre se jo chehre ko haTa kar dekha

wo talluq teri ek zat se jo tha mujh ko

us talluq ko bahar-e-haal nibha kar dekha

barf hi barf nazar aati hai ta-hadd-e-nazar

zindagi hum ne teri khoj mein ja kar dekha

jawedan ho gaya har naghma-e-pur-dard mera

mere honTon se zamane ne chura kar dekha