humne is baat ko pahle kabhi socha hi nahin

ham ne is baat ko pahle kabhī sochā hī nahīñ

ki yahāñ dil kī zabāñ koī samajhtā hī nahīñ

sar chhupāne ko daraḳhtoñ kī ghanī chhāñv bhī hai

shahr meñ ik tirī dīvār kā saaya hī nahīñ

jis meñ kho jaa.eñ to rasta na mile shahroñ kā

shāyad is daur meñ aisā koī sahrā hī nahīñ

tū jahāñ jā.egī māyūs palaT aa.egī

zindagī koī tirā pūchhne vaalā hī nahīñ

Duub jaanā hī muqaddar meñ likhā hai shāyad

is samandar meñ jahāñ koī jazīra hī nahīñ

jaane kyoñ TuuT ke vo shaḳhs milā thā mujh se

is se pahle kahīñ jis ne mujhe dekhā hī nahīñ

maiñ bhare ghar meñ akelā huuñ baḌī muddat se

merā ġham ye hai ki mujh ko koī samjhā hī nahīñ

tum añdhere meñ kise DhūñD rahe ho 'vālī'

koī rātoñ meñ yahāñ ghar se nikaltā hī nahīñ

hum ne is baat ko pahle kabhi socha hi nahin

ki yahan dil ki zaban koi samajhta hi nahin

sar chhupane ko daraKHton ki ghani chhanw bhi hai

shahr mein ek teri diwar ka saya hi nahin

jis mein kho jaen to rasta na mile shahron ka

shayad is daur mein aisa koi sahra hi nahin

tu jahan jaegi mayus palaT aaegi

zindagi koi tera puchhne wala hi nahin

Dub jaana hi muqaddar mein likha hai shayad

is samandar mein jahan koi jazira hi nahin

jaane kyon TuT ke wo shaKHs mila tha mujh se

is se pahle kahin jis ne mujhe dekha hi nahin

main bhare ghar mein akela hun baDi muddat se

mera gham ye hai ki mujh ko koi samjha hi nahin

tum andhere mein kise DhunD rahe ho 'wali'

koi raaton mein yahan ghar se nikalta hi nahin