humne jis se bhi aashnai ki

ham ne jis se bhī āshnā.ī kī

ham se us ne hī bevafā.ī kī

haq-ba-jānib ho tum bajā hai bajā

maiñ ne kī maiñ ne bevafā.ī kī

un se ham tālib-e-vafā kyoñ hoñ

ham ko aadat nahīñ gadā.ī kī

bevafā.ī se bhī vafā na karo

tum ko aadat hai bevafā.ī kī

bevafā.ī kā us se kyā shikva

mujh se dil hī ne bevafā.ī kī

zulf-o-āriz pe ham nahīñ marte

aur hai shaan dilrubā.ī kī

shaiḳh ko rind kar diyā maiñ ne

na chalī kuchh bhī pārsā.ī kī

tālib-e-vasl ham na hoñge kabhī

vasl tamhīd hai judā.ī kī

bevafā bhī nahīñ ho puure tum

koī had bhī hai bevafā.ī kī

kyoñ ḳhajil hoñ huzūr ke dushman

maiñ ne kī maiñ ne bevafā.ī kī

shaan paidā hai tere partav se

zarre-zarre meñ ḳhud-numā.ī kī

jis qadar ham ne kī vafā tum se

us qadar tum ne bevafā.ī kī

kis kā zikr-e-vafā kareñ 'as.ad'

jis ne kī ham se bevafā.ī kī

hum ne jis se bhi aashnai ki

hum se us ne hi bewafai ki

haq-ba-jaanib ho tum baja hai baja

main ne ki main ne bewafai ki

un se hum talib-e-wafa kyon hon

hum ko aadat nahin gadai ki

bewafai se bhi wafa na karo

tum ko aadat hai bewafai ki

bewafai ka us se kya shikwa

mujh se dil hi ne bewafai ki

zulf-o-ariz pe hum nahin marte

aur hai shan dilrubai ki

shaiKH ko rind kar diya main ne

na chali kuchh bhi parsai ki

talib-e-wasl hum na honge kabhi

wasl tamhid hai judai ki

bewafa bhi nahin ho pure tum

koi had bhi hai bewafai ki

kyon KHajil hon huzur ke dushman

main ne ki main ne bewafai ki

shan paida hai tere partaw se

zarre-zarre mein KHud-numai ki

jis qadar hum ne ki wafa tum se

us qadar tum ne bewafai ki

kis ka zikr-e-wafa karen 'asad'

jis ne ki hum se bewafai ki