humne KHud apni mohabbat ka gala ghonT diya

ham ne ḳhud apnī mohabbat kā galā ghoñT diyā

dil se uThtī huī chāhat kā galā ghoñT diyā

jo thī sachchā.ī vo zāhir hī nahīñ ho paa.ī

ik fasāne ne haqīqat kā galā ghoñT diyā

haq-bayānī ke liye jab vo huā mahv-e-kalām

ik suḳhanvar ne siyāsat kā galā ghoñT diyā

bas yahāñ denā thā paiġhām-e-mohabbat lekin

kis qadar sab ne rivāyat kā galā ghoñT diyā

kāmyābī bhī qadam us ke hī chūmegī yahāñ

jis ne ḳhud apnī zarūrat kā galā ghoñT diyā

ḳhāna-e-dil meñ sadā jis ko basāyā maiñ ne

us ne hī merī masarrat kā galā ghoñT diyā

dil kā har dard thā sarmāya-e-hastī lekin

'faiz' ne apnī hī ulfat kā galā ghoñT diyā

hum ne KHud apni mohabbat ka gala ghonT diya

dil se uThti hui chahat ka gala ghonT diya

jo thi sachchai wo zahir hi nahin ho pai

ek fasane ne haqiqat ka gala ghonT diya

haq-bayani ke liye jab wo hua mahw-e-kalam

ek suKHanwar ne siyasat ka gala ghonT diya

bas yahan dena tha paigham-e-mohabbat lekin

kis qadar sab ne riwayat ka gala ghonT diya

kaamyabi bhi qadam us ke hi chumegi yahan

jis ne KHud apni zarurat ka gala ghonT diya

KHana-e-dil mein sada jis ko basaya main ne

us ne hi meri masarrat ka gala ghonT diya

dil ka har dard tha sarmaya-e-hasti lekin

'faiz' ne apni hi ulfat ka gala ghonT diya