humne KHud chheDa hai zaKHmon ko hara rakhna tha

ham ne ḳhud chheḌā hai zaḳhmoñ ko harā rakhnā thā

ḳhud ko ik shaḳhs se tā-umr ḳhafā rakhnā thā

tañg-dāmānī meñ dam ghuTtā hai dīvānoñ kā

ishq ham se thā to phir dil bhī baḌā rakhnā thā

hañste gaate hue din guzrā hai ham logoñ kā

raat ko aur zarā karb-zada rakhnā thā

kam se kam raushnī kā da.avā nahīñ karte tum

jab charāġhoñ ke muqaddar meñ havā rakhnā thā

rañg udāsī ke na jā.eñge chalo maanā magar

kam se kam kamre kā huliya to nayā rakhnā thā

ek ummīd jagā rakhnī thī rukne ke liye

us ko thoḌā sā to darvāza khulā rakhnā thā

jaan le legā firāq ab ki sar-e-ishq tumheñ

dil chalo Thiik magar jism judā rakhnā thā

roz to aate nahīñ ahl-e-azā bastī meñ

un kī ḳhātir to koī dard nayā rakhnā thā

hum ne KHud chheDa hai zaKHmon ko hara rakhna tha

KHud ko ek shaKHs se ta-umr KHafa rakhna tha

tang-damani mein dam ghuTta hai diwanon ka

ishq hum se tha to phir dil bhi baDa rakhna tha

hanste gate hue din guzra hai hum logon ka

raat ko aur zara karb-zada rakhna tha

kam se kam raushni ka dawa nahin karte tum

jab charaghon ke muqaddar mein hawa rakhna tha

rang udasi ke na jaenge chalo mana magar

kam se kam kamre ka huliya to naya rakhna tha

ek ummid jaga rakhni thi rukne ke liye

us ko thoDa sa to darwaza khula rakhna tha

jaan le lega firaq ab ki sar-e-ishq tumhein

dil chalo Thik magar jism juda rakhna tha

roz to aate nahin ahl-e-aza basti mein

un ki KHatir to koi dard naya rakhna tha