humne raste mein koi shama jala di hoti

ham ne raste meñ koī sham.a jalā dī hotī

duur se hī jo kabhī tum ne sadā dī hotī

mere sab giit tumhāre hī liye haiñ shāyad

tum ne in gītoñ meñ āvāz milā dī hotī

tum ne to kuchh bhī na kahne kī qasam khaa.ī thī

baat jo dil meñ thī ham ne hī batā dī hotī

bhiig jaanī thiiñ is tarah tumhārī palkeñ

vo kahānī jo tumheñ ham ne sunā dī hotī

shāyad insān kā jiinā hī bahut mushkil thā

raaz kī baat jo qudrat ne batā dī hotī

'nāz' bachpan meñ kināre se vo lag hī jaatī

naav kāġhaz kī jo paanī meñ bahā dī hotī

hum ne raste mein koi shama jala di hoti

dur se hi jo kabhi tum ne sada di hoti

mere sab git tumhaare hi liye hain shayad

tum ne in giton mein aawaz mila di hoti

tum ne to kuchh bhi na kahne ki qasam khai thi

baat jo dil mein thi hum ne hi bata di hoti

bhig jaani thin is tarah tumhaari palken

wo kahani jo tumhein hum ne suna di hoti

shayad insan ka jina hi bahut mushkil tha

raaz ki baat jo qudrat ne bata di hoti

'naz' bachpan mein kinare se wo lag hi jati

naw kaghaz ki jo pani mein baha di hoti