humne shab-e-firaq jo aansu bahae hain

ham ne shab-e-firāq jo aañsū bahā.e haiñ

vo āsmāñ pe kāhkashāñ ban ke chhā.e haiñ

mad.hosh ham hue to vo tashrīf laa.e haiñ

aise bhī zindagī meñ ka.ī vaqt aa.e haiñ

badlā hai jab mizāj nasīm-e-bahār kā

ham ne qadam qadam pe bagūle uThā.e haiñ

kyā aap jalva-rez haiñ merī nigāh meñ

yā phir mirī nigāh ne parde uThā.e haiñ

mahrūm rakh na apnī tajallī se ai ḳhudā

muusā kī tarah dīda-o-dil ham bhī laa.e haiñ

āh-e-firāq dāġh-e-tamannā junūn-e-shauq

jitne charāġh haiñ tirī mahfil se aa.e haiñ

tasvīr-e-'dard' ḳhud haiñ magar is kā kyā ilaaj

saare jahāñ ke ġham ko ġham-e-dil banā.e haiñ

hum ne shab-e-firaq jo aansu bahae hain

wo aasman pe kahkashan ban ke chhae hain

madhosh hum hue to wo tashrif lae hain

aise bhi zindagi mein kai waqt aae hain

badla hai jab mizaj nasim-e-bahaar ka

hum ne qadam qadam pe bagule uThae hain

kya aap jalwa-rez hain meri nigah mein

ya phir meri nigah ne parde uThae hain

mahrum rakh na apni tajalli se ai KHuda

musa ki tarah dida-o-dil hum bhi lae hain

aah-e-firaq dagh-e-tamanna junun-e-shauq

jitne charagh hain teri mahfil se aae hain

taswir-e-'dard' KHud hain magar is ka kya ilaj

sare jahan ke gham ko gham-e-dil banae hain