humne Thukra diya jo bas mein tha

ham ne Thukrā diyā jo bas meñ thā

varna ik ḳhvāb dastaras meñ thā

maiñ bhī iz.hār kar nahīñ paa.ī

aur kuchh dil bhī pesh-o-pas meñ thā

chhīn lā.ūñ tirī mohabbat kā

har vo pal jo ga.e baras meñ thā

us ke kūche meñ ham ne dekhā hai

kaif sā ek ḳhār-o-ḳhas meñ thā

shab guzārī gulāb lamhoñ meñ

koī ehsās har nafas meñ thā

us ko āzād kar nahīñ paa.ī

dil parinda kisī qafas meñ thā

kyā mohabbat ko DhūñDhtī 'ambar'

mubtalā har koī havas meñ thā

hum ne Thukra diya jo bas mein tha

warna ek KHwab dastaras mein tha

main bhi izhaar kar nahin pai

aur kuchh dil bhi pesh-o-pas mein tha

chhin laun teri mohabbat ka

har wo pal jo gae baras mein tha

us ke kuche mein hum ne dekha hai

kaif sa ek KHar-o-KHas mein tha

shab guzari gulab lamhon mein

koi ehsas har nafas mein tha

us ko aazad kar nahin pai

dil parinda kisi qafas mein tha

kya mohabbat ko DhunDhti 'ambar'

mubtala har koi hawas mein tha