humne TuTte KHwab ko yun aankh mein pas-andaz likha

ham ne TūTte ḳhvāb ko yuuñ aañkh meñ pas-andāz likhā

sarf-e-nazar ke hāshiye meñ aañsū ko hamrāz likhā

sabz ḳhayāl ke takiye par na.ī-navelī chhāp lagī

jab palkoñ ke dhāgoñ se kāḌhā to gul-nāz likhā

sub.h-e-tavajjoh hote hī jab chehre kā phuul khilā

rang-o-bū ke māthe par jhuk kar jā-e-namāz likhā

pyāsī ret kī lahroñ se phūTī 'ibārat paanī kī

jādūgarān-e-sahrā ne bas dariyā-pardāz likhā

shahriyyat kī īñToñ se jab bhī dil tā'mīr kiyā

dīvāroñ kī qismat meñ darvāzoñ kā naaz likhā

ham lauh-e-mahfūz meñ the naql-e-makānī vājib thī

so bāb-e-hijrat kholā aur nasheb-o-farāz likhā

ik shorīda-lafzī sī har safhe par uḌī phirī

likhne meñ jo nahīñ aayā āḳhir vo andāz likhā

hum ne TuTte KHwab ko yun aankh mein pas-andaz likha

sarf-e-nazar ke hashiye mein aansu ko hamraaz likha

sabz KHayal ke takiye par nai-naweli chhap lagi

jab palkon ke dhagon se kaDha to gul-naz likha

subh-e-tawajjoh hote hi jab chehre ka phul khila

rang-o-bu ke mathe par jhuk kar ja-e-namaz likha

pyasi ret ki lahron se phuTi 'ibarat pani ki

jadugaran-e-sahra ne bas dariya-pardaz likha

shahriyyat ki inTon se jab bhi dil ta'mir kiya

diwaron ki qismat mein darwazon ka naz likha

hum lauh-e-mahfuz mein the naql-e-makani wajib thi

so bab-e-hijrat khola aur nasheb-o-faraaz likha

ek shorida-lafzi si har safhe par uDi phiri

likhne mein jo nahin aaya aaKHir wo andaz likha