humne wo dasht sanwara hai zamane ke liye

ham ne vo dasht sañvārā hai zamāne ke liye

log aate haiñ jahāñ ḳhud ko miTāne ke liye

ham-safar apnī zarūrat se ziyāda na chale

raah chaltī rahī iqrār nibhāne ke liye

us ko aatā hai sivā rasm-e-judā.ī kā hunar

dar khulā chhoḌ gayā lauT kar aane ke liye

ham bhī hoñ ḳhāk-nashīnoñ kī rivāyat ke amiiñ

chāhe ik musht mile ḳhaak uḌāne ke liye

har qadam saath rahī manzil-e-dil-shād magar

kū-ba-kū phirte rahe Thokareñ khāne ke liye

niiñd aa.e to koī bāb-e-aziyyat hī khule

dastakī yaañ haiñ bahut ḳhvāb satāne ke liye

bol ai gardish-e-ayyām kahāñ jaa.e ye dil

silsila kuchh to bane umr gañvāne ke liye

dar-ba-dar hotī rahī apnī anā kāsa-ba-kaf

sar bhī ḳham hotā rahā qarz chukāne ke liye

sāmnā kar na sakā apnī haqīqat kā 'shakīl'

aa.ina toḌ diyā ḳhud ko chhupāne ke liye

hum ne wo dasht sanwara hai zamane ke liye

log aate hain jahan KHud ko miTane ke liye

ham-safar apni zarurat se ziyaada na chale

rah chalti rahi iqrar nibhane ke liye

us ko aata hai siwa rasm-e-judai ka hunar

dar khula chhoD gaya lauT kar aane ke liye

hum bhi hon KHak-nashinon ki riwayat ke amin

chahe ek musht mile KHak uDane ke liye

har qadam sath rahi manzil-e-dil-shad magar

ku-ba-ku phirte rahe Thokaren khane ke liye

nind aae to koi bab-e-aziyyat hi khule

dastaki yan hain bahut KHwab satane ke liye

bol ai gardish-e-ayyam kahan jae ye dil

silsila kuchh to bane umr ganwane ke liye

dar-ba-dar hoti rahi apni ana kasa-ba-kaf

sar bhi KHam hota raha qarz chukane ke liye

samna kar na saka apni haqiqat ka 'shakil'

aaina toD diya KHud ko chhupane ke liye