hum par na karenge wo jafa soch rahe hain

ham par na kareñge vo jafā soch rahe haiñ

ye soch rahe haiñ to burā soch rahe haiñ

ye aap ke altāf-o-karam kā hai natīja

achchhe the jo kal aaj burā soch rahe haiñ

puurī koī hotī nahīñ insāñ kī tamanna

kyā kiije talab vaqt-e-duā soch rahe haiñ

itne to kabhī dast-e-hasīñ surḳh na dekhe

ye ḳhuun hai yā dast-e-hinā soch rahe haiñ

ma.alūm nahīñ jin ko fazā apne vatan kī

duniyā kī hai kis ruḳh pe havā soch rahe haiñ

hairat hai ki har fard ko bīmār banā kar

ab vaqt ke luqmān davā soch rahe haiñ

insāñ kī tabāhī ke liye kyā kareñ taḳhlīq

duniyā-e-taraqqī ke ḳhudā soch rahe haiñ

jiine ke liye shaiḳh ye socheñ ki kareñ kyā

firdaus kī kyoñ ba.ad-e-fanā soch rahe haiñ

manzūr mire zikr pe vo sar ko jhukā.e

kis fikr meñ Duube hue kyā soch rahe haiñ

hum par na karenge wo jafa soch rahe hain

ye soch rahe hain to bura soch rahe hain

ye aap ke altaf-o-karam ka hai natija

achchhe the jo kal aaj bura soch rahe hain

puri koi hoti nahin insan ki tamanna

kya kije talab waqt-e-dua soch rahe hain

itne to kabhi dast-e-hasin surKH na dekhe

ye KHun hai ya dast-e-hina soch rahe hain

malum nahin jin ko faza apne watan ki

duniya ki hai kis ruKH pe hawa soch rahe hain

hairat hai ki har fard ko bimar bana kar

ab waqt ke luqman dawa soch rahe hain

insan ki tabahi ke liye kya karen taKHliq

duniya-e-taraqqi ke KHuda soch rahe hain

jine ke liye shaiKH ye sochen ki karen kya

firdaus ki kyon baad-e-fana soch rahe hain

manzur mere zikr pe wo sar ko jhukae

kis fikr mein Dube hue kya soch rahe hain