hum pe ilzam bewafai ke

ham pe ilzām bevafā.ī ke

haa.e andāz dilrubā.ī ke

un ke haath aa ga.ī jahāñ-dārī

vo jo qābil na the gadā.ī ke

kārvāñ ko unhī ne luuTā hai

shor the jin kī rahnumā.ī ke

ham haiñ ‘ijz-o-niyāz kī tasvīr

aap paikar haiñ ḳhud-numā.ī ke

un ke dāman bhī dāġhdār mile

jin ko dā've the pārsā.ī ke

ham se pūchho ki kyā hai lazzat-e-ġham

ham ne jhele haiñ dukh judā.ī ke

ham ne kaaTī haiñ hijr kī rāteñ

ham ne dekhe haiñ din judā.ī ke

in ḳhudāyān-e-jabr ko 'fārūq'

zo'm kitne haiñ kibriyā.ī ke

hum pe ilzam bewafai ke

hae andaz dilrubai ke

un ke hath aa gai jahan-dari

wo jo qabil na the gadai ke

karwan ko unhi ne luTa hai

shor the jin ki rahnumai ke

hum hain ‘ijz-o-niyaz ki taswir

aap paikar hain KHud-numai ke

un ke daman bhi daghdar mile

jin ko da'we the parsai ke

hum se puchho ki kya hai lazzat-e-gham

hum ne jhele hain dukh judai ke

hum ne kaTi hain hijr ki raaten

hum ne dekhe hain din judai ke

in KHudayan-e-jabr ko 'faruq'

zo'm kitne hain kibriyai ke