hum qafas mein rah ke jis ko aashiyan kahte rahe

ham qafas meñ rah ke jis ko āshiyāñ kahte rahe

thī faqat hadd-e-nazar ham āsmāñ kahte rahe

ik sarāb-e-mustaqil ko gulsitāñ kahte rahe

us but-e-nā-mehrbāñ ko mehrbāñ kahte rahe

āñdhiyoñ ne āshiyāne to miTā Daalā magar

chand tinke āshiyāñ kī dāstāñ kahte rahe

jab zabāñ ne saath chhoḌā ban ga.iiñ ye tarjumāñ

ham jin āñkhoñ ko hamesha be-zabāñ kahte rahe

kārvāñ nazroñ se ojhal thā aur ojhal hī rahā

ham ġhubār-e-kārvāñ ko kārvāñ kahte rahe

dil ke ik chhoTe se goshe meñ vo jā kar gum huā

jis ko nādānī meñ ham saarā jahāñ kahte rahe

is aqīdat kā burā ho ham bayābāñ ko bhī 'mehr'

ḳhūn-e-dil se sīñchte aur gulsitāñ kahte rahe

hum qafas mein rah ke jis ko aashiyan kahte rahe

thi faqat hadd-e-nazar hum aasman kahte rahe

ek sarab-e-mustaqil ko gulsitan kahte rahe

us but-e-na-mehrban ko mehrban kahte rahe

aandhiyon ne aashiyane to miTa Dala magar

chand tinke aashiyan ki dastan kahte rahe

jab zaban ne sath chhoDa ban gain ye tarjuman

hum jin aankhon ko hamesha be-zaban kahte rahe

karwan nazron se ojhal tha aur ojhal hi raha

hum ghubar-e-karwan ko karwan kahte rahe

dil ke ek chhoTe se goshe mein wo ja kar gum hua

jis ko nadani mein hum sara jahan kahte rahe

is aqidat ka bura ho hum bayaban ko bhi 'mehr'

KHun-e-dil se sinchte aur gulsitan kahte rahe