hum ruh-e-kaenat hain naqsh-e-asas hain

ham rūh-e-kā.enāt haiñ naqsh-e-asās haiñ

ham vaqt kā ḳhamīr zamāne kī baas haiñ

tanhā haiñ ham tamām na qurbat na fāsle

ham aap ke qarīb na ham apne paas haiñ

kab se Tañge hue haiñ ḳhalāoñ ke aas paas

kab se ye āsmāñ ke sitāre udaas haiñ

ḳhud haT ga.e haiñ duur vo paanī ke zor se

dariyā ke vo kināre jo dariyā-shanās haiñ

ḳhud-rav haiñ ham hameñ na ḳhizāñ se Darā.iye

sahrā ke mast phuul haiñ jañgal kī ghaas haiñ

kitnī bahāreñ aa ke chaman se guzar ga.iiñ

ham haiñ ki ek gul ke liye mahv-e-yās haiñ

jin ke badan pe atlas-o-kamḳhāb hai 'samad'

sach pūchhiye to log vahī be-libās haiñ

hum ruh-e-kaenat hain naqsh-e-asas hain

hum waqt ka KHamir zamane ki bas hain

tanha hain hum tamam na qurbat na fasle

hum aap ke qarib na hum apne pas hain

kab se Tange hue hain KHalaon ke aas pas

kab se ye aasman ke sitare udas hain

KHud haT gae hain dur wo pani ke zor se

dariya ke wo kinare jo dariya-shanas hain

KHud-raw hain hum hamein na KHizan se Daraiye

sahra ke mast phul hain jangal ki ghas hain

kitni bahaaren aa ke chaman se guzar gain

hum hain ki ek gul ke liye mahw-e-yas hain

jin ke badan pe atlas-o-kamKHab hai 'samad'

sach puchhiye to log wahi be-libas hain