humse bichhaD ke tumne socha paoge aaram bahut

ham se bichhaḌ ke tum ne sochā pāoge ārām bahut

ye nahīñ sochā dushman-e-jāñ haiñ hijr ke sub.h-o-shām bahut

ishq-e-butāñ ke ham par hī kyoñ aa.ed haiñ ilzām bahut

'mīr'-o-'mirzā' 'hasrat' 'fānī' aur haiñ aise naam bahut

maiñ ne logoñ ko na batāyā kis ne mujhe barbād kiyā

lekin merī ḳhāmoshī ne dohrāyā ik naam bahut

dushman-e-jāñ hai yuuñ to us kī sāda-nigāhī bhī lekin

jin se muḳhātib hoñ vo nigāheñ un ke liye paiġhām bahut

ham to sab kuchh bhuul chuke the aaj ye kaisī baat huī

jis meñ ham donoñ bichhḌe the yaad aa.ī vo shaam bahut

ulfat kī sarkār se 'vāsil' ham to paate rahte haiñ

hasrat-o-armāñ kī sauġhāteñ zaḳhmoñ ke in.aam bahut

hum se bichhaD ke tum ne socha paoge aaram bahut

ye nahin socha dushman-e-jaan hain hijr ke subh-o-sham bahut

ishq-e-butan ke hum par hi kyon aaed hain ilzam bahut

'mir'-o-'mirza' 'hasrat' 'fani' aur hain aise nam bahut

main ne logon ko na bataya kis ne mujhe barbaad kiya

lekin meri KHamoshi ne dohraya ek nam bahut

dushman-e-jaan hai yun to us ki sada-nigahi bhi lekin

jin se muKHatib hon wo nigahen un ke liye paigham bahut

hum to sab kuchh bhul chuke the aaj ye kaisi baat hui

jis mein hum donon bichhDe the yaad aai wo sham bahut

ulfat ki sarkar se 'wasil' hum to pate rahte hain

hasrat-o-arman ki saughaten zaKHmon ke inam bahut