humse chhup kar hamein dekhta kaun tha

ham se chhup kar hameñ dekhtā kaun thā

ham jahāñ the vahāñ tīsrā kaun thā

kis ne rāhoñ meñ merī ugaa.e the chāñd

merī ḳhātir mujassam duā kaun thā

aaj tak maiñ samajh na sakā ek shaḳhs

merā dushman thā yā dost thā kaun thā

mere chehroñ kī gintī kise yaad thī

mujh se baḌh kar mirā āshnā kaun thā

merī āñkhoñ se chhup kar mire jism meñ

raat aañsū bahātā huā kaun thā

tum agar apne qātil nahīñ ho 'ḳhumār'

to vo tum jaisī hī shakl kā kaun thā

hum se chhup kar hamein dekhta kaun tha

hum jahan the wahan tisra kaun tha

kis ne rahon mein meri ugae the chand

meri KHatir mujassam dua kaun tha

aaj tak main samajh na saka ek shaKHs

mera dushman tha ya dost tha kaun tha

mere chehron ki ginti kise yaad thi

mujh se baDh kar mera aashna kaun tha

meri aankhon se chhup kar mere jism mein

raat aansu bahata hua kaun tha

tum agar apne qatil nahin ho 'KHumar'

to wo tum jaisi hi shakl ka kaun tha