humse hi raushan raha hai tere maiKHane ka nam

ham se hī raushan rahā hai tere maiḳhāne kā naam

ham hī le sakte nahīñ ab ek paimāne kā naam

zīnat-e-sad-anjuman hai aap kī maujūdgī

hai qayāmat aap ke mahfil se uTh jaane kā naam

dil ke bahlāne pe duniyā ne kiye haiñ vo sulūk

ab na leñge bhuul kar bhī dil ko bahlāne kā naam

raat kī ra.anā.iyāñ haiñ zulf-e-barham ke tufail

sub.h-e-sādiq aap ke aariz sañvar jaane kā naam

dar-haqīqat zindagī kyā hai ye ham se pūchhiye

maut se āñkheñ milā kar zahr pī jaane kā naam

toḌ kar is zindagī ke ḳhud-tarāshīda sanam

ham ne ka.aba rakh liyā hai dil ke but-ḳhāne kā naam

chappe-chappe par junūñ ne kar diye raushan charāġh

varna 'shā.ir' jāntā thā kaun vīrāne kā naam

hum se hi raushan raha hai tere maiKHane ka nam

hum hi le sakte nahin ab ek paimane ka nam

zinat-e-sad-anjuman hai aap ki maujudgi

hai qayamat aap ke mahfil se uTh jaane ka nam

dil ke bahlane pe duniya ne kiye hain wo suluk

ab na lenge bhul kar bhi dil ko bahlane ka nam

raat ki ranaiyan hain zulf-e-barham ke tufail

subh-e-sadiq aap ke aariz sanwar jaane ka nam

dar-haqiqat zindagi kya hai ye hum se puchhiye

maut se aankhen mila kar zahr pi jaane ka nam

toD kar is zindagi ke KHud-tarashida sanam

hum ne kaba rakh liya hai dil ke but-KHane ka nam

chappe-chappe par junun ne kar diye raushan charagh

warna 'shair' jaanta tha kaun virane ka nam