humse is dard ki tafsir kahan honi thi

ham se is dard kī tafsīr kahāñ honī thī

koī rāñjhā hī na thā hiir kahāñ honī thī

tū ki alfāz kī hurmat se nahīñ thā vāqif

phir tirī baat meñ tāsīr kahāñ honī thī

saath dete jo mirā mere qabīle vaale

tire hāthoñ meñ ye shamshīr kahāñ honī thī

ḳhud hī muñh moḌ liyā tum ne hamī se varna

tum bulāte to ye tāḳhīr kahāñ honī thī

tū ne ḳhud ahl-e-mohabbat meñ bharam khoyā hai

varna bastī meñ ye tash.hīr kahāñ honī thī

ye varaq dil kā tire baa'd to saada hī rahā

is pe phir koī bhī tahrīr kahāñ honī thī

ham ko bhī apnī anā jaan se pyārī thī bahut

hijr kī paañv meñ zanjīr kahāñ honī thī

hum se is dard ki tafsir kahan honi thi

koi ranjha hi na tha hir kahan honi thi

tu ki alfaz ki hurmat se nahin tha waqif

phir teri baat mein tasir kahan honi thi

sath dete jo mera mere qabile wale

tere hathon mein ye shamshir kahan honi thi

KHud hi munh moD liya tum ne hami se warna

tum bulate to ye taKHir kahan honi thi

tu ne KHud ahl-e-mohabbat mein bharam khoya hai

warna basti mein ye tashhir kahan honi thi

ye waraq dil ka tere ba'd to sada hi raha

is pe phir koi bhi tahrir kahan honi thi

hum ko bhi apni ana jaan se pyari thi bahut

hijr ki panw mein zanjir kahan honi thi