humse karte ho bayan ghairon ki yari aan kar

ham se karte ho bayāñ ġhairoñ kī yaarī aan kar

rah ga.ī hai aap kī ye dost-dārī aan kar

ham ko aane se tumhārī bazm ke kyā thā husūl

dekh lete the magar sūrat tumhārī aan kar

rūThne par mere kyā lāzim thā ho jaanā ḳhafā

balki karnī thī tumheñ ḳhātir hamārī aan kar

ta.an-e-bad-ḳhvāhāñ se tū ik-dam na pāvegā qarār

kī jo tere dar pe ham ne be-qarārī aan kar

thā agarche ġhash meñ majnūñ lekin āñkheñ khul ga.iiñ

sar pe us ke jis ghaḌī lailā pukārī aan kar

jis jigar-kushta kā tere lāsha thā ḳhuuñ meñ paḌā

ḳhuub sā royā vahāñ abr-e-bahārī aan kar

maiñ bhī kyā bargashta-tāle.a huuñ ki 'tanhā' raat ko

phir ga.ī dar tak mire us kī savārī aan kar

hum se karte ho bayan ghairon ki yari aan kar

rah gai hai aap ki ye dost-dari aan kar

hum ko aane se tumhaari bazm ke kya tha husul

dekh lete the magar surat tumhaari aan kar

ruThne par mere kya lazim tha ho jaana KHafa

balki karni thi tumhein KHatir hamari aan kar

tan-e-bad-KHwahan se tu ik-dam na pawega qarar

ki jo tere dar pe hum ne be-qarari aan kar

tha agarche ghash mein majnun lekin aankhen khul gain

sar pe us ke jis ghaDi laila pukari aan kar

jis jigar-kushta ka tere lasha tha KHun mein paDa

KHub sa roya wahan abr-e-bahaari aan kar

main bhi kya bargashta-talea hun ki 'tanha' raat ko

phir gai dar tak mere us ki sawari aan kar