humse logon ka jahan bhar mein Thikana kya hai

ham se logoñ kā jahāñ bhar meñ Thikānā kyā hai

tum to sab jānte ho tum ko batānā kyā hai

jo diyā dekh ke bīnā.ī se mahrūm huā

aise kam-zarf ko sūraj kā dikhānā kyā hai

terī qismat jo ravāñ zindagī hāsil hai tujhe

tū nahīñ jāntā dhakke se chalānā kyā hai

hotī duurī to tire ġham ko manāte ham bhī

kaun sā hijr tirā ḳhvāb meñ aanā kyā hai

maiñ jo andāze lagāne meñ lagā huuñ kab se

kyā koī mujh ko batā.egā zamāna kyā hai

dasht meñ ret thī yā ishq kī daulat ‘sāhib’

ghar se nikle to samajh aa.ī kamānā kyā hai

hum se logon ka jahan bhar mein Thikana kya hai

tum to sab jaante ho tum ko batana kya hai

jo diya dekh ke binai se mahrum hua

aise kam-zarf ko suraj ka dikhana kya hai

teri qismat jo rawan zindagi hasil hai tujhe

tu nahin jaanta dhakke se chalana kya hai

hoti duri to tere gham ko manate hum bhi

kaun sa hijr tera KHwab mein aana kya hai

main jo andaze lagane mein laga hun kab se

kya koi mujh ko bataega zamana kya hai

dasht mein ret thi ya ishq ki daulat ‘sahib’

ghar se nikle to samajh aai kamana kya hai