humse pahle to koi yun na phira aawara

ham se pahle to koī yuuñ na phirā āvāra

dard āvāra dil āvāra vafā āvāra

kyā use mil ga.ī kuchh tere badan kī ḳhushbū

aaj phūloñ meñ nahīñ aa.ī sabā āvāra

jis kī nuzhat se do-bālā thī vatan kī raunaq

shahr se duur mujhe vo bhī milā āvāra

maiñ ne kab mujh se na milne kā gilā tum se kiyā

ab mujhe tum na kaho bahr-e-ḳhudā āvāra

phir tirī yaad ne siine meñ baserā Daalā

phir tire shahr meñ ābād huā āvāra

be-karāñ vaqt kī bandish se milī āzādī

chand lamhoñ ke liye maiñ bhī huā āvāra

tohmat-e-qadr bhī hai jabr kī rusvā.ī meñ

pā-ba-zanjīr ko bhī tum ne kahā āvāra

dhuup hai taptī huī ret hai vīrānī hai

aaj dekhā nahīñ vo ābla-pā āvāra

bevafā logoñ ke hāthoñ se chhuḌā kar dāman

dil meñ kis shauq se phirtī hai vafā āvāra

sochtā huuñ ki use jab na mile sharaf-e-qubūl

kin ḳhalāoñ meñ bhaTaktī hai duā āvāra

ek āñdhī ġham-e-jānāñ kī zarā Thahrī thī

ik bagūlā ġham-e-daurāñ kā uThā āvāra

kitnī āñkhoñ ke ta.āqub se hirāmāñ ho kar

kunj-e-tanhā.ī meñ ābād huā āvāra

ruḳh-e-raushan kī jhalak shart-e-vafā hai jānāñ

terī galiyoñ kā pata bhuul gayā āvāra

ḳhema-zan phir se huī sehn-e-chaman bād-e-sumūm

phir mire saath huī bād-e-sabā āvāra

manzil-e-ishq pe pahuñche to koī saath na thā

dil judā ḳhāk-basar aañkh judā āvāra

nutq vīrān hai alfāz pareshāñ haiñ 'munīr'

soch hai sañg-e-girāñ aur sadā āvāra

hum se pahle to koi yun na phira aawara

dard aawara dil aawara wafa aawara

kya use mil gai kuchh tere badan ki KHushbu

aaj phulon mein nahin aai saba aawara

jis ki nuzhat se do-baala thi watan ki raunaq

shahr se dur mujhe wo bhi mila aawara

main ne kab mujh se na milne ka gila tum se kiya

ab mujhe tum na kaho bahr-e-KHuda aawara

phir teri yaad ne sine mein basera Dala

phir tere shahr mein aabaad hua aawara

be-karan waqt ki bandish se mili aazadi

chand lamhon ke liye main bhi hua aawara

tohmat-e-qadr bhi hai jabr ki ruswai mein

pa-ba-zanjir ko bhi tum ne kaha aawara

dhup hai tapti hui ret hai virani hai

aaj dekha nahin wo aabla-pa aawara

bewafa logon ke hathon se chhuDa kar daman

dil mein kis shauq se phirti hai wafa aawara

sochta hun ki use jab na mile sharaf-e-qubul

kin KHalaon mein bhaTakti hai dua aawara

ek aandhi gham-e-jaanan ki zara Thahri thi

ek bagula gham-e-dauran ka uTha aawara

kitni aankhon ke taaqub se hiraman ho kar

kunj-e-tanhai mein aabaad hua aawara

ruKH-e-raushan ki jhalak shart-e-wafa hai jaanan

teri galiyon ka pata bhul gaya aawara

KHema-zan phir se hui sehn-e-chaman baad-e-sumum

phir mere sath hui baad-e-saba aawara

manzil-e-ishq pe pahunche to koi sath na tha

dil juda KHak-basar aankh juda aawara

nutq viran hai alfaz pareshan hain 'munir'

soch hai sang-e-giran aur sada aawara