humse puchhe koi chahat ka saza ho jaana

ham se pūchhe koī chāhat kā sazā ho jaanā

narm guftār kā patthar kā ḳhudā ho jaanā

jab maiñ unvān-e-mohabbat pe koī nazm likhūñ

tum mahakte hue lafzoñ kī qabā ho jaanā

naam ḳhvāboñ kī salīboñ pe na likhiye merā

merī fitrat hai haqīqat pe fidā ho jaanā

maiñ ne puujā thā tumheñ dard-e-mohabbat ke sabab

tum se ye kis ne kahā thā ki ḳhudā ho jaanā

dasht-e-tūfāñ meñ agar merā safīna dekho

tum mirī maañ kī tarah mahv-e-duā ho jaanā

ab takalluf se koī kaam na lenā 'āmir'

jab vo tum se hoñ ḳhafā tum bhī ḳhafā ho jaanā

hum se puchhe koi chahat ka saza ho jaana

narm guftar ka patthar ka KHuda ho jaana

jab main unwan-e-mohabbat pe koi nazm likhun

tum mahakte hue lafzon ki qaba ho jaana

nam KHwabon ki salibon pe na likhiye mera

meri fitrat hai haqiqat pe fida ho jaana

main ne puja tha tumhein dard-e-mohabbat ke sabab

tum se ye kis ne kaha tha ki KHuda ho jaana

dasht-e-tufan mein agar mera safina dekho

tum meri man ki tarah mahw-e-dua ho jaana

ab takalluf se koi kaam na lena 'amir'

jab wo tum se hon KHafa tum bhi KHafa ho jaana