humse to koi dost banae nahin jate

ham se to koī dost banā.e nahīñ jaate

khoTe kabhī sikke to chalā.e nahīñ jaate

patthar se kabhī dil na lagā lenā ki patthar

shīshe ke makānoñ meñ sajā.e nahīñ jaate

us ne mujhe ye kahte hue chhoḌ diyā thā

patthar pe kabhī phuul khilā.e nahīñ jaate

ġhazloñ ke parastār ko tum ġhazleñ dikhāo

andhoñ ko ye ā.īne dikhā.e nahīñ jaate

kuchh log to sūraj bhī chhupāne meñ lage haiñ

ham se to diye koī bujhā.e nahīñ jaate

kab rāz-e-mohabbat vo chhupā pā.eñge dil meñ

ḳhat jin se kitāboñ meñ chhupā.e nahīñ jaate

karte haiñ jahāzoñ ko uḌāne ke vo dā've

jin se ye parinde bhī uḌaa.e nahīñ jaate

har raaz batā sakte haiñ duniyā ko magar 'dil'

kuchh raaz haiñ aise jo batā.e nahīñ jaate

hum se to koi dost banae nahin jate

khoTe kabhi sikke to chalae nahin jate

patthar se kabhi dil na laga lena ki patthar

shishe ke makanon mein sajae nahin jate

us ne mujhe ye kahte hue chhoD diya tha

patthar pe kabhi phul khilae nahin jate

ghazlon ke parastar ko tum ghazlen dikhao

andhon ko ye aaine dikhae nahin jate

kuchh log to suraj bhi chhupane mein lage hain

hum se to diye koi bujhae nahin jate

kab raaz-e-mohabbat wo chhupa paenge dil mein

KHat jin se kitabon mein chhupae nahin jate

karte hain jahazon ko uDane ke wo da'we

jin se ye parinde bhi uDae nahin jate

har raaz bata sakte hain duniya ko magar 'dil'

kuchh raaz hain aise jo batae nahin jate