humse zara charaghon ka jo man ho gaya

ham se zarā charāġhoñ kā jo maan ho gayā

yā'nī añdherī raat kā nuqsān ho gayā

hote nahīñ haiñ paañv kabhī jhuuT ke magar

itnā chalā ki jhuuT pareshān ho gayā

tū ne nahīñ bikhere kabhī rāstoñ meñ ḳhaar

phir bhī ḳhasāra 'ishq ke daurān ho gayā

māneñge us kī baat ko mahkūm kī tarah

hākim hamāre vāste bhagvān ho gayā

maiñ ḳhud meñ kho gayā tirī tasvīr dekh kar

puujā ke saath saath mirā dhyān ho gayā

kartā nahīñ madad koī ik dūsre kī ab

kaisā ye āj-kal dil-e-insān ho gayā

utre nahīñ chaman meñ mirī chāhatoñ ke phuul

dil kā ye baaġh merā bayābān ho gayā

yā-rab utaar mujh meñ vahī āgahī kā peḌ

gautam ko jis ke nīche sahaj gyaan ho gayā

shahr-e-suḳhan kī tohmateñ kitnī 'ajīb haiñ

'anvar' ġhazal ko kah ke musalmān ho gayā

hum se zara charaghon ka jo man ho gaya

ya'ni andheri raat ka nuqsan ho gaya

hote nahin hain panw kabhi jhuT ke magar

itna chala ki jhuT pareshan ho gaya

tu ne nahin bikhere kabhi raston mein KHar

phir bhi KHasara 'ishq ke dauran ho gaya

manenge us ki baat ko mahkum ki tarah

hakim hamare waste bhagwan ho gaya

main KHud mein kho gaya teri taswir dekh kar

puja ke sath sath mera dhyan ho gaya

karta nahin madad koi ek dusre ki ab

kaisa ye aaj-kal dil-e-insan ho gaya

utre nahin chaman mein meri chahaton ke phul

dil ka ye bagh mera bayaban ho gaya

ya-rab utar mujh mein wahi aagahi ka peD

gautam ko jis ke niche sahaj gyan ho gaya

shahr-e-suKHan ki tohmaten kitni 'ajib hain

'anwar' ghazal ko kah ke musalman ho gaya