hum shukr-e-jafa shukr-e-sitam karte rahenge

ham shukr-e-jafā shukr-e-sitam karte raheñge

ye jaan ye dil nazr-e-sanam karte raheñge

jin ko tirī āñkhoñ kī haqīqat nahīñ mā'lūm

vo hasrat-e-paimāna-e-jam karte raheñge

vo parvarish-e-lauh-o-qalam meñ raheñ masrūf

ham tarbiyat-e-lauh-o-qalam karte raheñge

hogā na koī qāfila āvāra-e-manzil

ye kaam mire naqsh-e-qadam karte raheñge

ḳhuddārī-e-jamhūr ko niiñd aa.ī huī hai

ham shikva-e-arbāb-e-qalam karte raheñge

har shāḳh-e-gulistāñ pe banā.ūñgā nasheman

har shāḳh kahāñ tak vo qalam karte raheñge

'jarrār' taḌapne meñ 'ajab lutf milā hai

hañs hañs ke vo kyā pursish-e-ġham karte raheñge

hum shukr-e-jafa shukr-e-sitam karte rahenge

ye jaan ye dil nazr-e-sanam karte rahenge

jin ko teri aankhon ki haqiqat nahin ma'lum

wo hasrat-e-paimana-e-jam karte rahenge

wo parwarish-e-lauh-o-qalam mein rahen masruf

hum tarbiyat-e-lauh-o-qalam karte rahenge

hoga na koi qafila aawara-e-manzil

ye kaam mere naqsh-e-qadam karte rahenge

KHuddari-e-jamhur ko nind aai hui hai

hum shikwa-e-arbab-e-qalam karte rahenge

har shaKH-e-gulistan pe banaunga nasheman

har shaKH kahan tak wo qalam karte rahenge

'jarrar' taDapne mein 'ajab lutf mila hai

hans hans ke wo kya pursish-e-gham karte rahenge