hum sitaron mein tera aks na Dhalne denge

ham sitāroñ meñ tirā aks nā Dhalne deñge

chāñd ko shaam kī dahlīz pe jalne deñge

aaj chhū leñge koī arsh mire vahm-o-gumāñ

ḳhvāb ko niiñd kī āñkhoñ meñ machalne deñge

ham bhī dekheñge kahāñ tak hai rasā.ī apnī

dil ko bahlā.eñge ham aur nā sambhalne deñge

shab kī āġhosh meñ phaileñ na gumāñ ke saa.e

ab nigāhoñ meñ koī ḳhauf nā palne deñge

ho na jaa.e kahīñ anjām se pahle anjām

is kahānī ko isī taur se chalne deñge

aks-dar-aks mileñge tujhe manzar manzar

tū jo chāhe bhī kahāñ tujh ko badalne deñge

naqsh-dar-naqsh hue jā.eñge bas ḳhaak yahīñ

ḳhuud ko is dasht-e-gumāñ se nā nikalne deñge

hum sitaron mein tera aks na Dhalne denge

chand ko sham ki dahliz pe jalne denge

aaj chhu lenge koi arsh mere wahm-o-guman

KHwab ko nind ki aankhon mein machalne denge

hum bhi dekhenge kahan tak hai rasai apni

dil ko bahlaenge hum aur na sambhalne denge

shab ki aaghosh mein phailen na guman ke sae

ab nigahon mein koi KHauf na palne denge

ho na jae kahin anjam se pahle anjam

is kahani ko isi taur se chalne denge

aks-dar-aks milenge tujhe manzar manzar

tu jo chahe bhi kahan tujh ko badalne denge

naqsh-dar-naqsh hue jaenge bas KHak yahin

KHud ko is dasht-e-guman se na nikalne denge