hum soz-e-dil bayan karen tum se kahan talak

ham soz-e-dil bayāñ kareñ tum se kahāñ talak

jalne lagī hai ab to hamārī zabāñ talak

kuchh be-kasī-e-rāh-rau-e-ġham na pūchhiye

miltī nahīñ hai gard-e-rah-e-kārvāñ talak

sharmā ke lauT aa.e na jab kuchh asar huā

naale hamāre pahuñche to the āsmāñ talak

ummīd-e-bāda kis ko hai ḳhūn-e-jigar piyo

hai mohtasib ke ruup meñ pīr-e-muġhāñ talak

rāz-o-niyāz-e-ishq kī kyā ho ḳhabar hameñ

hāsil nahīñ hai dīd-e-ruḳh-e-mahvashāñ talak

kis muñh se ham bayān kareñ mājrā-e-dil

un ko nahīñ pasand hai soz-e-nihāñ talak

ham ko qafas hī raas huā barq ke tufail

baaqī nahīñ chaman meñ rahā āshiyāñ talak

pā-e-za.īf ba.ad meñ chāheñ to TuuT jaa.eñ

pahuñchā deñ ek baar to kū-e-butāñ talak

shāyad baqā-e-ishq isī shai ko kahte haiñ

ham bhuul baiThe ġham meñ zamān-o-makāñ talak

yaaro hamārī ziist kā qissa hai muḳhtasar

mahdūd hai hadīs-e-ġham-e-dil-barāñ talak

mutlaq nahīñ hai 'kaif' ko da.avā-e-jazb-e-dil

maqdūr is kā girya-o-āh-o-fuġhāñ talak

hum soz-e-dil bayan karen tum se kahan talak

jalne lagi hai ab to hamari zaban talak

kuchh be-kasi-e-rah-rau-e-gham na puchhiye

milti nahin hai gard-e-rah-e-karwan talak

sharma ke lauT aae na jab kuchh asar hua

nale hamare pahunche to the aasman talak

ummid-e-baada kis ko hai KHun-e-jigar piyo

hai mohtasib ke rup mein pir-e-mughan talak

raaz-o-niyaz-e-ishq ki kya ho KHabar hamein

hasil nahin hai did-e-ruKH-e-mahwashan talak

kis munh se hum bayan karen majra-e-dil

un ko nahin pasand hai soz-e-nihan talak

hum ko qafas hi ras hua barq ke tufail

baqi nahin chaman mein raha aashiyan talak

pa-e-zaif baad mein chahen to TuT jaen

pahuncha den ek bar to ku-e-butan talak

shayad baqa-e-ishq isi shai ko kahte hain

hum bhul baiThe gham mein zaman-o-makan talak

yaro hamari zist ka qissa hai muKHtasar

mahdud hai hadis-e-gham-e-dil-baran talak

mutlaq nahin hai 'kaif' ko dawa-e-jazb-e-dil

maqdur is ka girya-o-ah-o-fughan talak