hum suKHan-go ek din sab raegan rah jaenge

ham suḳhan-go ek din sab rā.egāñ rah jā.eñge

bas hamāre harf haiñ jo jāvedāñ rah jā.eñge

saa.e tak jismoñ ke vo le jā.egā de kar sadā

dhuup meñ tanhā jhulaste sā.ebāñ rah jā.eñge

vo hasīñ bāñheñ hamāre jism ko Thukrā na deñ

yuuñ huā to kis qadar ham be-amāñ rah jā.eñge

tum mohabbat meñ anāḌī ho isī se dekh lo

jaise tum ne mujh ko chūmā hai nishāñ rah jā.eñge

maiñ samundar kī ra'ūnat chhīn luuñ us se agar

har taraf phaile hue koh-e-girāñ rah jā.eñge

vaqt aa baiThegā is meñ aur āḳhir par yahāñ

naav rah jā.egī TuuTe bādbāñ rah jā.eñge

shāhzādī 'ishq kar baiThegī dushman se 'muqīm'

mere hāthoñ meñ faqat tīr-o-kamāñ rah jā.eñge

hum suKHan-go ek din sab raegan rah jaenge

bas hamare harf hain jo jawedan rah jaenge

sae tak jismon ke wo le jaega de kar sada

dhup mein tanha jhulaste saeban rah jaenge

wo hasin banhen hamare jism ko Thukra na den

yun hua to kis qadar hum be-aman rah jaenge

tum mohabbat mein anaDi ho isi se dekh lo

jaise tum ne mujh ko chuma hai nishan rah jaenge

main samundar ki ra'unat chhin lun us se agar

har taraf phaile hue koh-e-giran rah jaenge

waqt aa baiThega is mein aur aaKHir par yahan

naw rah jaegi TuTe baadban rah jaenge

shahzadi 'ishq kar baiThegi dushman se 'muqim'

mere hathon mein faqat tir-o-kaman rah jaenge