hum sunaenge tujhe apna fasana ek din

ham sunā.eñge tujhe apnā fasāna ek din

yuuñ nahīñ ai zindagī fursat meñ aanā ek din

baat lambī vaqt thoḌā aañkh nam hai aap kī

is tarah bhī kyā ḳhabar thī hogā jaanā ek din

baat aa.ī hai zabāñ pe arz kar duuñ jo kaho

ham ne chāhā thā tumheñ apnā banānā ek din

rah na jaa.e koī hasrat kar guzar jo tujh se ho

varna is andhe kueñ meñ sab ko jaanā ek din

ho sakā na kuchh bhī ham se ai vatan kar de muaaf

ham ne chāhā thā tujhe jannat banānā ek din

sau tahoñ meñ qaid hai ab har ḳhushī insān kī

sau tahoñ ko chiir kar hai paar jaanā ek din

baat apnī ġham purāne aur terī dāstāñ

sun zamāne kuchh hameñ bhī thā sunānā ek din

in phuhāroñ se na TūTeñgī ye chaTTāneñ 'salīl'

le ke tum ko bijliyāñ ab hogā aanā ek din

hum sunaenge tujhe apna fasana ek din

yun nahin ai zindagi fursat mein aana ek din

baat lambi waqt thoDa aankh nam hai aap ki

is tarah bhi kya KHabar thi hoga jaana ek din

baat aai hai zaban pe arz kar dun jo kaho

hum ne chaha tha tumhein apna banana ek din

rah na jae koi hasrat kar guzar jo tujh se ho

warna is andhe kuen mein sab ko jaana ek din

ho saka na kuchh bhi hum se ai watan kar de muaf

hum ne chaha tha tujhe jannat banana ek din

sau tahon mein qaid hai ab har KHushi insan ki

sau tahon ko chir kar hai par jaana ek din

baat apni gham purane aur teri dastan

sun zamane kuchh hamein bhi tha sunana ek din

in phuhaaron se na TuTengi ye chaTTanen 'salil'

le ke tum ko bijliyan ab hoga aana ek din