hum talKHi-e-hayat ko aasan na kar sake

ham talḳhī-e-hayāt ko āsāñ na kar sake

sahrā.ī-zindagī ko gulistāñ na kar sake

thā zo.am jin ko apnī masīhā.ī kā yahāñ

vo bhī ilāj-e-sozish-e-pinhāñ na kar sake

vāraftagī-e-shauq meñ shal ho ga.e badan

aabid tavāf-e-kūcha-e-jānāñ na kar sake

kuchh yuuñ chalī thī bād-e-havādis ki ki umr-bhar

qindīl-e-ārzū ko farozāñ na kar sake

ālām-e-āshiqī ne kiyā ḳhud se be-ḳhabar

ham tazkira-e-saḳhtī-e-daurāñ na kar sake

aisā chubhā hai nashtar-e-bedād-e-ārzū

ham zindagī meñ phir koī armāñ na kar sake

bād-e-nasīm ab ke 'muzaffar' ajiib thī

ham ehtimām-e-sub.h-e-bahārāñ na kar sake

hum talKHi-e-hayat ko aasan na kar sake

sahrai-zindagi ko gulistan na kar sake

tha zoam jin ko apni masihai ka yahan

wo bhi ilaj-e-sozish-e-pinhan na kar sake

waraftagi-e-shauq mein shal ho gae badan

aabid tawaf-e-kucha-e-jaanan na kar sake

kuchh yun chali thi baad-e-hawadis ki ki umr-bhar

qindil-e-arzu ko farozan na kar sake

aalam-e-ashiqi ne kiya KHud se be-KHabar

hum tazkira-e-saKHti-e-dauran na kar sake

aisa chubha hai nashtar-e-bedad-e-arzu

hum zindagi mein phir koi arman na kar sake

baad-e-nasim ab ke 'muzaffar' ajib thi

hum ehtimam-e-subh-e-bahaaran na kar sake