hum Thahre barbaad-e-mohabbat aalam sara jaane hai

ham Thahre barbād-e-mohabbat aalam saarā jaane hai

dil pe hamāre kyā guzre hai dil hī hamārā jaane hai

ai sāhil se dekhne vaalo tum ko ye ma.alūm nahīñ

Dūbne vaalā kyoñ tinke ko apnā sahārā jaane hai

tum kyā jaano ishq-e-butāñ ko tum ne ishq kiyā kab hai

un kī adā-e-jaur-o-sitam ko dard kā maarā jaane hai

ham bhī haqīqat jaan rahe haiñ baiThe baiThe ḳhvāboñ kī

vo hai nazar kā dhokā jis ko dil ye nazārā jaane hai

galiyoñ galiyoñ phirtā hai jo dil meñ tumhārī yaad liye

duniyā us ko pāgal samjhe aur bechāra jaane hai

aap ise samjheñ na samjheñ ham ko hai ma.alūm 'majīd'

koī to hai jo ham ko abhī tak aañkh kā taarā jaane hai

hum Thahre barbaad-e-mohabbat aalam sara jaane hai

dil pe hamare kya guzre hai dil hi hamara jaane hai

ai sahil se dekhne walo tum ko ye malum nahin

Dubne wala kyon tinke ko apna sahaara jaane hai

tum kya jaano ishq-e-butan ko tum ne ishq kiya kab hai

un ki ada-e-jaur-o-sitam ko dard ka mara jaane hai

hum bhi haqiqat jaan rahe hain baiThe baiThe KHwabon ki

wo hai nazar ka dhoka jis ko dil ye nazara jaane hai

galiyon galiyon phirta hai jo dil mein tumhaari yaad liye

duniya us ko pagal samjhe aur bechaara jaane hai

aap ise samjhen na samjhen hum ko hai malum 'majid'

koi to hai jo hum ko abhi tak aankh ka tara jaane hai