hum to har gham ko jahan ke gham-e-jaanan samjhe

ham to har ġham ko jahāñ ke ġham-e-jānāñ samjhe

jab baḌhā nashsha to ham bāda-e-irfāñ samjhe

jo bahāroñ ko sahar-kārī-e-daurāñ samjhe

zindagānī ko vahī ḳhvāb-e-pareshāñ samjhe

fikr-e-ījād-e-sitam meñ vo jhukā.e the jabīñ

ham unheñ apnī jafāoñ pe pashemāñ samjhe

khā gayā ek jahāñ mere tabassum kā fareb

jo mirī tarah pareshāñ the pareshāñ samjhe

ham ne shikva na kiyā 'shauq' kisī se ġham kā

apnī taqdīr ko apne se gurezāñ samjhe

hum to har gham ko jahan ke gham-e-jaanan samjhe

jab baDha nashsha to hum baada-e-irfan samjhe

jo bahaaron ko sahar-kari-e-dauran samjhe

zindagani ko wahi KHwab-e-pareshan samjhe

fikr-e-ijad-e-sitam mein wo jhukae the jabin

hum unhen apni jafaon pe pasheman samjhe

kha gaya ek jahan mere tabassum ka fareb

jo meri tarah pareshan the pareshan samjhe

hum ne shikwa na kiya 'shauq' kisi se gham ka

apni taqdir ko apne se gurezan samjhe