hum to hon dil se dur rahen pas aur log

ham to hoñ dil se duur raheñ paas aur log

sūñgheñ gul-e-ezār kī bū-bās aur log

vā'iz hameñ Darā na vafūr-e-gunāh se

us ke karam se hote haiñ be-ās aur log

saudā-e-ishq yaañ to hai sar meñ bharā huā

nām-e-junūñ se karte haiñ visvās aur log

āzād-gān-e-ishq har ik haal meñ haiñ shaad

hoñge asīr-o-ranj-o-ġham-o-yās aur log

haiñ ser boriyā-e-tavakkul ke fāqa-mast

hote haiñ muztarib dam-e-iflās aur log

yaañ hai faqat havas dur-e-dandāñ ke diid kī

khāte haiñ us ke dāñtoñ pe almās aur log

sanjog ek apnā tumhārā azal se hai

pūchheñ brahmanoñ se buto raas aur log

uTThe fanā o ek na ik kyā ba.iid hai

ab baiThne lage haiñ tire paas aur log

us āb-e-la.al par kabhī ham bhī muhīt the

lab chuus kar bujhā.e haiñ ab pyaas aur log

ham to na ghar meñ aap ke dam-bhar Thaharne paa.eñ

roz aa.eñ jaa.eñ sūrat-e-anfās aur log

apne nasīb meñ to na ho āb-e-ḳhizr-e-lab

sairāb hoñ ba-sūrat-e-ilyās aur log

dīvān meñ mire nahīñ bhartī ke aise sher

bharte haiñ jaise safha-e-qirtās aur log

vo bevafā karegā mirī qadr kyā 'qalaq'

karte haiñ apne 'āshiqoñ kā paas aur log

hum to hon dil se dur rahen pas aur log

sunghen gul-e-ezar ki bu-bas aur log

wa'iz hamein Dara na wafur-e-gunah se

us ke karam se hote hain be-as aur log

sauda-e-ishq yan to hai sar mein bhara hua

nam-e-junun se karte hain wiswas aur log

aazad-gan-e-ishq har ek haal mein hain shad

honge asir-o-ranj-o-gham-o-yas aur log

hain ser boriya-e-tawakkul ke faqa-mast

hote hain muztarib dam-e-iflas aur log

yan hai faqat hawas dur-e-dandan ke did ki

khate hain us ke danton pe almas aur log

sanjog ek apna tumhaara azal se hai

puchhen brahmanon se buto ras aur log

uTThe fana o ek na ek kya baid hai

ab baiThne lage hain tere pas aur log

us aab-e-lal par kabhi hum bhi muhit the

lab chus kar bujhae hain ab pyas aur log

hum to na ghar mein aap ke dam-bhar Thaharne paen

roz aaen jaen surat-e-anfas aur log

apne nasib mein to na ho aab-e-KHizr-e-lab

sairab hon ba-surat-e-ilyas aur log

diwan mein mere nahin bharti ke aise sher

bharte hain jaise safha-e-qirtas aur log

wo bewafa karega meri qadr kya 'qalaq'

karte hain apne 'ashiqon ka pas aur log