hum to karbal ko hi bas dar-e-baqa kahte hain

ham to karbal ko hī bas dār-e-baqā kahte haiñ

us kī miTTī ko suno ḳhāk-e-shifā kahte haiñ

ye to bas mujh se hī ho jaatī hai ġhaflat aksar

jo bhī kahte haiñ baḌe mere bajā kahte haiñ

pheñkī lakḌī to kabhī rasta kabhī saañp banā

us ko lakḌī nahīñ muusā kā asā kahte haiñ

maiñ sazā lafz kī tārīf batātā huuñ suno

muntazir hone ko bhī jaan sazā kahte haiñ

bhuuk marte hue bachchoñ ko jo khānā lā de

us masīhā ko hī farzand-e-ḳhudā kahte haiñ

kitne saada haiñ makīñ yaar tirī bastī ke

zahr ke jaam ko bhī āb-e-baqā kahte haiñ

shams tabrez se apnī hai aqīdat itnī

ham qalandar ko tabhī shams-numā kahte haiñ

jo tirī yaad meñ har raat bapā hotī hai

aisī mahfil ko 'sahar' bazm-e-azā kahte haiñ

hum to karbal ko hi bas dar-e-baqa kahte hain

us ki miTTi ko suno KHak-e-shifa kahte hain

ye to bas mujh se hi ho jati hai ghaflat aksar

jo bhi kahte hain baDe mere baja kahte hain

phenki lakDi to kabhi rasta kabhi sanp bana

us ko lakDi nahin musa ka asa kahte hain

main saza lafz ki tarif batata hun suno

muntazir hone ko bhi jaan saza kahte hain

bhuk marte hue bachchon ko jo khana la de

us masiha ko hi farzand-e-KHuda kahte hain

kitne sada hain makin yar teri basti ke

zahr ke jam ko bhi aab-e-baqa kahte hain

shams tabrez se apni hai aqidat itni

hum qalandar ko tabhi shams-numa kahte hain

jo teri yaad mein har raat bapa hoti hai

aisi mahfil ko 'sahar' bazm-e-aza kahte hain