hum to mashur the shiddat ke sabab bol uThe

ham to mas.hūr the shiddat ke sabab bol uThe

vo but-e-sañg bhī mumkin hai ki ab bol uThe

phuul alfāz ke pheñke haiñ usī kī jānib

jaane vo jān-e-adā naaz se kab bol uThe

sāmnā un kā huā jab to thī nazreñ nīchī

be-qarārī meñ mire dast-e-talab bol uThe

qatl merā bhī huā aur shah-e-vaqt kā bhī

ik pe ḳhāmosh rahe ek pe sab bol uThe

uTh ke sahrāoñ se maġhrib ko hilā de āñdhī

yak-zabāñ ho ke agar arz-e-arab bol uThe

mutma.in kyuuñ haiñ javāñ chhātī pe patthar rakh kar

vaqt paḌne pe 'asar' koh ke lab bol uThe

hum to mashur the shiddat ke sabab bol uThe

wo but-e-sang bhi mumkin hai ki ab bol uThe

phul alfaz ke phenke hain usi ki jaanib

jaane wo jaan-e-ada naz se kab bol uThe

samna un ka hua jab to thi nazren nichi

be-qarari mein mere dast-e-talab bol uThe

qatl mera bhi hua aur shah-e-waqt ka bhi

ek pe KHamosh rahe ek pe sab bol uThe

uTh ke sahraon se maghrib ko hila de aandhi

yak-zaban ho ke agar arz-e-arab bol uThe

mutmain kyun hain jawan chhati pe patthar rakh kar

waqt paDne pe 'asar' koh ke lab bol uThe