hum to us kuche mein ghabra ke chale aate hain

ham to us kūche meñ ghabrā ke chale aate haiñ

do qadam jaate haiñ phir jā ke chale aate haiñ

ham ko ai sharm Tuk ab us kī taraf jaane de

haal apnā use dikhlā ke chale aate haiñ

din ko zinhār Thaharte nahīñ ham us kū maiñ

raat ko milne kī Thahrā ke chale aate haiñ

vo adā-kushta Thahartā nahīñ phir maqtal meñ

laash ko jis kī vo Thukrā ke chale aate haiñ

maiñ bharose hī meñ rahtā huuñ tirī zulfoñ meñ

yaar mere mujhe phañsvā ke chale aate haiñ

vo jo miltā nahīñ ham us kī galī meñ dil ko

dar-o-dīvār se bahlā ke chale aate haiñ

jaate haiñ kūche meñ ham us ke to vaañ ġhair ko dekh

phir na aane kī qasam khā ke chale aate haiñ

qaidī mar jaate haiñ jab aap kabhī zindāñ ke

qufl darvāze ko lagvā ke chale aate haiñ

chhuTte haiñ jo asīrān-e-qafas gulshan meñ

kyā hī par shauq se phailā ke chale aate haiñ

ġhair jab vasl kā kartā hai savāl un se to ve

kaise mahjūb ho dam khā ke chale aate haiñ

rah-ravān-e-safar-e-bādiya-e-ishq ai vaa.e

qāfile raah meñ luTvā ke chale aate haiñ

maiñ to samjhā thā bujhāveñge kuchh aañsū tuf-e-dil

ye to aur aag ko bhaḌkā ke chale aate haiñ

saath mayyat ke mirī vo nahīñ chalte do qadam

bas vahīñ na.ash ko uThvā ke chale aate haiñ

dil kī betābī se jaate to haiñ ham us kū meñ

lek is jaane se pachhtā ke chale aate haiñ

badraqa gar nahīñ ahbāb to phir kyuuñ pas-e-marg

tā-ba-manzil mujhe pahuñchā ke chale aate haiñ

'mus.hafī' ke ta.iiñ dekheñ haiñ jo vo kushta paḌā

paas jaate nahīñ sharmā ke chale aate haiñ

hum to us kuche mein ghabra ke chale aate hain

do qadam jate hain phir ja ke chale aate hain

hum ko ai sharm Tuk ab us ki taraf jaane de

haal apna use dikhla ke chale aate hain

din ko zinhaar Thaharte nahin hum us ku main

raat ko milne ki Thahra ke chale aate hain

wo ada-kushta Thaharta nahin phir maqtal mein

lash ko jis ki wo Thukra ke chale aate hain

main bharose hi mein rahta hun teri zulfon mein

yar mere mujhe phanswa ke chale aate hain

wo jo milta nahin hum us ki gali mein dil ko

dar-o-diwar se bahla ke chale aate hain

jate hain kuche mein hum us ke to wan ghair ko dekh

phir na aane ki qasam kha ke chale aate hain

qaidi mar jate hain jab aap kabhi zindan ke

qufl darwaze ko lagwa ke chale aate hain

chhuTte hain jo asiran-e-qafas gulshan mein

kya hi par shauq se phaila ke chale aate hain

ghair jab wasl ka karta hai sawal un se to we

kaise mahjub ho dam kha ke chale aate hain

rah-rawan-e-safar-e-baadiya-e-ishq ai wae

qafile rah mein luTwa ke chale aate hain

main to samjha tha bujhawenge kuchh aansu tuf-e-dil

ye to aur aag ko bhaDka ke chale aate hain

sath mayyat ke meri wo nahin chalte do qadam

bas wahin nash ko uThwa ke chale aate hain

dil ki betabi se jate to hain hum us ku mein

lek is jaane se pachhta ke chale aate hain

badraqa gar nahin ahbab to phir kyun pas-e-marg

ta-ba-manzil mujhe pahuncha ke chale aate hain

'mushafi' ke tain dekhen hain jo wo kushta paDa

pas jate nahin sharma ke chale aate hain