hum to uTThenge usi rah pe chalne ke liye

ham to uTTheñge usī raah pe chalne ke liye

vaqt lagtā hai magar kar ke sañbhalne ke liye

saaz bechain hai har dard ugalne ke liye

naġhme be-tāb haiñ tāroñ se nikalne ke liye

koī ūñchā.ī pe rahtā nahīñ duniyā meñ sadā

roz sūraj bhī nikaltā hai to Dhalne ke liye

kuchh na kuchh kījiye hujroñ se nikal kar apne

vā.izo qaum kī qismat ko badalne ke liye

har taraf aag hai nafrat kī vatan meñ phailī

sirf ham log haiñ is aag meñ jalne ke liye

ham jahāñ rahte haiñ us shahr kī tārīf suno

har musībat yahāñ aatī hai na Talne ke liye

apnā māhaul bhī badlā nahīñ apne hāthoñ

ham to nikle the zamāne ko badalne ke liye

ek muuzī hī nahīñ ham ko nigalne vaalā

us ke azhdar bhī to haiñ ham ko nigalne ke liye

phuul khilte hī gulistāñ meñ achānak ai 'ziyā'

haath baḌhte haiñ faqat un ko masalne ke liye

hum to uTThenge usi rah pe chalne ke liye

waqt lagta hai magar kar ke sanbhalne ke liye

saz bechain hai har dard ugalne ke liye

naghme be-tab hain taron se nikalne ke liye

koi unchai pe rahta nahin duniya mein sada

roz suraj bhi nikalta hai to Dhalne ke liye

kuchh na kuchh kijiye hujron se nikal kar apne

waizo qaum ki qismat ko badalne ke liye

har taraf aag hai nafrat ki watan mein phaili

sirf hum log hain is aag mein jalne ke liye

hum jahan rahte hain us shahr ki tarif suno

har musibat yahan aati hai na Talne ke liye

apna mahaul bhi badla nahin apne hathon

hum to nikle the zamane ko badalne ke liye

ek muzi hi nahin hum ko nigalne wala

us ke azhdar bhi to hain hum ko nigalne ke liye

phul khilte hi gulistan mein achanak ai 'ziya'

hath baDhte hain faqat un ko masalne ke liye