hum tumhaare kuche ki rasm ko nibhaenge

ham tumhāre kūche kī rasm ko nibhā.eñge

phuul phuul aa.e the zaḳhm zaḳhm jā.eñge

tum hasīn phūloñ ko shāḳh shāḳh se chun lo

zard zard pattoñ ko ham sameT lā.eñge

dhuup ke musāfir haiñ dhuup dhuup chalne do

hai shajar shajar nangā sar kahāñ chhupā.eñge

fard fard rahne se qāfile nahīñ bante

fard fard mil hī kar qāfile banā.eñge

kuchh patā nahīñ chaltā raat kitnī baaqī hai

kab talak charāġhoñ meñ ḳhūn-e-dil jalā.eñge

ham buland-himmat haiñ teġh se nahīñ Darte

qātiloñ kī mahfil meñ sar uThā ke jā.eñge

tah-ba-tah zamāne kī gard jam ga.ī 'hāmī'

aa.ina huā dhuñdlā saaf kar na pā.eñge

hum tumhaare kuche ki rasm ko nibhaenge

phul phul aae the zaKHm zaKHm jaenge

tum hasin phulon ko shaKH shaKH se chun lo

zard zard patton ko hum sameT laenge

dhup ke musafir hain dhup dhup chalne do

hai shajar shajar nanga sar kahan chhupaenge

fard fard rahne se qafile nahin bante

fard fard mil hi kar qafile banaenge

kuchh pata nahin chalta raat kitni baqi hai

kab talak charaghon mein KHun-e-dil jalaenge

hum buland-himmat hain tegh se nahin Darte

qatilon ki mahfil mein sar uTha ke jaenge

tah-ba-tah zamane ki gard jam gai 'hami'

aaina hua dhundla saf kar na paenge