hum un ke ishq mein jalte hain aur pahlu badalte hain

ham un ke ishq meñ jalte haiñ aur pahlū badalte haiñ

hai kyā ye bhī maqām-e-rashk ham se log jalte haiñ

vo qatl-e-ām bhī kar deñ to un ko daad miltī hai

hamārī aañkh ke aañsū bhī is duniyā ko khalte haiñ

vo jab koī sitam dhāte haiñ jaane kyoñ ye hotā hai

na.e jazbe machalte haiñ na.e tūfāñ ubalte haiñ

alag ye baat hai chāleñ ulaT paḌtī haiñ ḳhud un par

vo jab chalte haiñ koī shātirāna chaal chalte haiñ

nigah rakkho ki in maujoñ meñ uft-o-ḳhez kaisī hai

kabhī ayyām ke dhāre achānak ruḳh badalte haiñ

baḌī pyārī lageñgī kal ye daur-e-hijr kī ghaḌiyāñ

abhī tak ḳhaam the jazbe so ab sāñche meñ Dhalte haiñ

adā-e-yār meñ ab ik nirālā tīkhā-pan ubhrā

nigāh-e-nāz meñ ab kuchh na.e pahlū nikalte haiñ

shab-e-tārīk-e-zindāñ kī siyāhī se na ghabrāo

isī kī god meñ fardā ke mehr-o-māh palte haiñ

hum un ke ishq mein jalte hain aur pahlu badalte hain

hai kya ye bhi maqam-e-rashk hum se log jalte hain

wo qatl-e-am bhi kar den to un ko dad milti hai

hamari aankh ke aansu bhi is duniya ko khalte hain

wo jab koi sitam dhate hain jaane kyon ye hota hai

nae jazbe machalte hain nae tufan ubalte hain

alag ye baat hai chaalen ulaT paDti hain KHud un par

wo jab chalte hain koi shatirana chaal chalte hain

nigah rakkho ki in maujon mein uft-o-KHez kaisi hai

kabhi ayyam ke dhaare achanak ruKH badalte hain

baDi pyari lagengi kal ye daur-e-hijr ki ghaDiyan

abhi tak KHam the jazbe so ab sanche mein Dhalte hain

ada-e-yar mein ab ek nirala tikha-pan ubhra

nigah-e-naz mein ab kuchh nae pahlu nikalte hain

shab-e-tarik-e-zindan ki siyahi se na ghabrao

isi ki god mein farda ke mehr-o-mah palte hain