hum un ke samne is tarah sharh-e-gham bayan kar len

ham un ke sāmne is tarah sharh-e-ġham bayāñ kar leñ

hamārī dāstāñ ko ḳhud vo apnī dāstāñ kar leñ

ilāhī aur bhī kuchh tuul kar de roz-e-mahshar ko

ki tere rū-ba-rū ḳhatm apne ġham kī dāstāñ kar leñ

vo bīnā.ī atā kar ham ko yā-rab dair-o-ka.aba kyā

tire jalve kā nazzāra jahāñ chāheñ vahāñ kar leñ

ḳhizāñ aane to do pūchheñge ham un se mizāj un kā

gul-o-ġhunche chaman meñ aur do din shoḳhiyāñ kar leñ

shab-e-ġham ġham ke pāloñ ko hai hāsil kyā ba-juz is ke

taḌap leñ āh-o-giryā kar leñ fariyād-o-fuġhāñ kar leñ

vo din aa.e kahīñ zauq-e-jabīñ-sā.ī meñ ai 'sābir'

ho zauq aisā ki jis meñ jazb un kā āstāñ kar leñ

hum un ke samne is tarah sharh-e-gham bayan kar len

hamari dastan ko KHud wo apni dastan kar len

ilahi aur bhi kuchh tul kar de roz-e-mahshar ko

ki tere ru-ba-ru KHatm apne gham ki dastan kar len

wo binai ata kar hum ko ya-rab dair-o-kaba kya

tere jalwe ka nazzara jahan chahen wahan kar len

KHizan aane to do puchhenge hum un se mizaj un ka

gul-o-ghunche chaman mein aur do din shoKHiyan kar len

shab-e-gham gham ke palon ko hai hasil kya ba-juz is ke

taDap len aah-o-girya kar len fariyaad-o-fughan kar len

wo din aae kahin zauq-e-jabin-sai mein ai 'sabir'

ho zauq aisa ki jis mein jazb un ka aastan kar len