hum uTThe to kya raunaq-e-mai-KHana wahi hai

ham uTThe to kyā raunaq-e-mai-ḳhāna vahī hai

saaqī vahī baada vahī paimāna vahī hai

farzāna jise kahte ho dīvāna vahī hai

dīvāna jise samjhe ho farzāna vahī hai

husn aur mohabbat kā hai mauzūa purānā

unvān badalte rahe afsāna vahī hai

is husn-e-jahāñ-tāb pe marte haiñ hazāroñ

dekho jise is husn kā parvāna vahī hai

dil de koī jaañ de koī izzat koī daulat

jo husn ko maqbūl ho nazrāna vahī hai

jo kul meñ hai vo juz meñ hai jo juz hai vahī kul

ā.īne ke TukḌoñ meñ parī-ḳhāna vahī hai

jis dil meñ ḳhudā rahtā thā tum aan base ho

ka.aba jo thā kal aaj sanam-ḳhāna vahī hai

din-rāt jo āñkhoñ se bahe paanī hai paanī

jo dukh meñ kisī ke bahe durdāna vahī hai

chaTkā bhī to dil kī tarah āvāz na ubhrī

jo ḳhaak se merī banā paimāna vahī hai

rāhat meñ to ma.abūd kā sab karte haiñ sajda

haañ dukh meñ kare yaad to shukrāna vahī hai

kyā baat hai gulshan kī 'fazā' kyoñ nahīñ badlī

sayyād vahī daam vahī daana vahī hai

hum uTThe to kya raunaq-e-mai-KHana wahi hai

saqi wahi baada wahi paimana wahi hai

farzana jise kahte ho diwana wahi hai

diwana jise samjhe ho farzana wahi hai

husn aur mohabbat ka hai mauzua purana

unwan badalte rahe afsana wahi hai

is husn-e-jahan-tab pe marte hain hazaron

dekho jise is husn ka parwana wahi hai

dil de koi jaan de koi izzat koi daulat

jo husn ko maqbul ho nazrana wahi hai

jo kul mein hai wo juz mein hai jo juz hai wahi kul

aaine ke TukDon mein pari-KHana wahi hai

jis dil mein KHuda rahta tha tum aan base ho

kaba jo tha kal aaj sanam-KHana wahi hai

din-raat jo aankhon se bahe pani hai pani

jo dukh mein kisi ke bahe durdana wahi hai

chaTka bhi to dil ki tarah aawaz na ubhri

jo KHak se meri bana paimana wahi hai

rahat mein to mabud ka sab karte hain sajda

han dukh mein kare yaad to shukrana wahi hai

kya baat hai gulshan ki 'faza' kyon nahin badli

sayyaad wahi dam wahi dana wahi hai