hum wo majbur ki hijrat bhi nahin kar sakte

ham vo majbūr ki hijrat bhī nahīñ kar sakte

ya.anī āzādī kī chāhat bhī nahīñ kar sakte

apne ka.abe pe to qabza hai azāzīloñ kā

ham to ab khul ke ibādat bhī nahīñ kar sakte

turkiyā mast-e-mai-e-nāb arab mast-e-ma.āsh

ab to vo merī himāyat bhī nahīñ kar sakte

qātilo Thahro zarā ek to sajda kar luuñ

kyā zarā sī ye ri.āyat bhī nahīñ kar sakte

jo bhī thā sab to luTā Daalā hai hazrat ab kyā

aap ab aur saḳhāvat bhī nahīñ kar sakte

naam rakkhā hai musalmānoñ sā mar jaao ki tum

qaum-e-muslim se barā.at bhī nahīñ kar sakte

'dānish-asrī’ ne batā.ī thī tumheñ kal kī ḳhabar

tum to ab us se shikāyat bhī nahīñ kar sakte

hum wo majbur ki hijrat bhi nahin kar sakte

yani aazadi ki chahat bhi nahin kar sakte

apne kabe pe to qabza hai azazilon ka

hum to ab khul ke ibaadat bhi nahin kar sakte

turkiya mast-e-mai-e-nab arab mast-e-maash

ab to wo meri himayat bhi nahin kar sakte

qatilo Thahro zara ek to sajda kar lun

kya zara si ye riayat bhi nahin kar sakte

jo bhi tha sab to luTa Dala hai hazrat ab kya

aap ab aur saKHawat bhi nahin kar sakte

nam rakkha hai musalmanon sa mar jao ki tum

qaum-e-muslim se baraat bhi nahin kar sakte

'danish-asri’ ne batai thi tumhein kal ki KHabar

tum to ab us se shikayat bhi nahin kar sakte