hum ye chahen hamein inkar ki jurat ho jae

ham ye chāheñ hameñ inkār kī jur.at ho jaa.e

lab tak aa.e to vahī harf-e-nadāmat ho jaa.e

merī socheñ mirā ehsās mirī hī āvāz

mere sheroñ se magar aap kī shohrat ho jaa.e

ḳhaak ho kar vo havāoñ meñ bikharnā chāhe

jab kisī ko dar-o-dīvār se vahshat ho jaa.e

aisī duniyā meñ baḌī baat hai zinda rahnā

yuuñ to vīrāne meñ rahnā bhī ibādat ho jaa.e

zindagī husn hai aur husn kashish rakhtā hai

varna har shaḳhs ko jaañ dene kī fursat ho jaa.e

iḳhtilāfāt bhī hoñ sulh bhī ho jaa.e agar

ranjishoñ meñ hameñ ehsās-e-muravvat ho jaa.e

hum ye chahen hamein inkar ki jurat ho jae

lab tak aae to wahi harf-e-nadamat ho jae

meri sochen mera ehsas meri hi aawaz

mere sheron se magar aap ki shohrat ho jae

KHak ho kar wo hawaon mein bikharna chahe

jab kisi ko dar-o-diwar se wahshat ho jae

aisi duniya mein baDi baat hai zinda rahna

yun to virane mein rahna bhi ibaadat ho jae

zindagi husn hai aur husn kashish rakhta hai

warna har shaKHs ko jaan dene ki fursat ho jae

iKHtilafat bhi hon sulh bhi ho jae agar

ranjishon mein hamein ehsas-e-murawwat ho jae