hamara aap ka rishta tamam umr chale

hamārā aap kā rishta tamām umr chale

ye do diloñ kā bharosa tamām umr chale

safar meñ tum ho agar ham-safar to kyā kahne

duā hai ishq kā rishta tamām umr chale

vo aaj mujh se muḳhātib hue haiñ muddat meñ

ḳhudā kare ki ye ḳhutba tamām umr chale

kisī tarah bhī munāsib nahīñ mohabbat meñ

zarā sī baat kā jhagḌā tamām umr chale

bas itnī baat samajh kar guzāro apnī hayāt

tamām umr kā saudā tamām umr chale

hai us ke chāroñ taraf bhiiḌ hirs vāloñ kī

to phir vo kyoñ na akelā tamām umr chale

mirī duā hai yahī mudda.ā bhī koshish bhī

ki muflisī tirā ḳharcha tamām umr chale

yahāñ kī āb-o-havā raas aa ga.ī 'rāshid'

na ḳhatm ho kabhī sahrā tamām umr chale

hamara aap ka rishta tamam umr chale

ye do dilon ka bharosa tamam umr chale

safar mein tum ho agar ham-safar to kya kahne

dua hai ishq ka rishta tamam umr chale

wo aaj mujh se muKHatib hue hain muddat mein

KHuda kare ki ye KHutba tamam umr chale

kisi tarah bhi munasib nahin mohabbat mein

zara si baat ka jhagDa tamam umr chale

bas itni baat samajh kar guzaro apni hayat

tamam umr ka sauda tamam umr chale

hai us ke chaaron taraf bhiD hirs walon ki

to phir wo kyon na akela tamam umr chale

meri dua hai yahi muddaa bhi koshish bhi

ki muflisi tera KHarcha tamam umr chale

yahan ki aab-o-hawa ras aa gai 'rashid'

na KHatm ho kabhi sahra tamam umr chale