hamara ashk nahin hai ye qadr-e-gauhar hai

hamārā ashk nahīñ hai ye qadr-e-gauhar hai

shikast zabt na kahiye use ye jauhar hai

usī ne dho.e haiñ dāman ke daaġh ai hamdam

usī kā aaj bhī patthar ke dil meñ kuchh Dar hai

hadīs-e-ranj-o-alam se Darā na ai nāseh

hadīs-e-ranj-o-alam hī to aaj ghar ghar hai

ḳhudāyā is se ziyāda huā to kyā hogā

nizām-e-zīst bahut āj-kal mukaddar hai

sar-e-niyāz kī jis ko sadā talāsh rahī

agar mile jo muqaddar se aap kā dar hai

tumhāre jalve pe mauqūf hai nizām-e-hayāt

agarche tuur kā qissa mujhe bhī azbar hai

fareb khā ke bhī vā'doñ pe e’tibār ai 'nūr'

'ajab shu.ūr-e-vafā terā mere dilbar hai

hamara ashk nahin hai ye qadr-e-gauhar hai

shikast zabt na kahiye use ye jauhar hai

usi ne dhoe hain daman ke dagh ai hamdam

usi ka aaj bhi patthar ke dil mein kuchh Dar hai

hadis-e-ranj-o-alam se Dara na ai naseh

hadis-e-ranj-o-alam hi to aaj ghar ghar hai

KHudaya is se ziyaada hua to kya hoga

nizam-e-zist bahut aaj-kal mukaddar hai

sar-e-niyaz ki jis ko sada talash rahi

agar mile jo muqaddar se aap ka dar hai

tumhaare jalwe pe mauquf hai nizam-e-hayat

agarche tur ka qissa mujhe bhi azbar hai

fareb kha ke bhi wa'don pe e’tibar ai 'nur'

'ajab shuur-e-wafa tera mere dilbar hai