hamara dil hi dariya ki agar manjdhaar ho jae

hamārā dil hī dariyā kī agar mañjdhār ho jaa.e

to kashtī ḳhvāhishoñ kī Duub kar bhī paar ho jaa.e

mile khul kar sabhī se aur phir bezār ho jaa.e

to jiinā aise dil ke saath ik āzār ho jaa.e

hameñ raat aur din kī kashmakash achchhī nahīñ lagtī

agar ye bhī na ho to zindagī be-kār ho jaa.e

ḳhamoshī is tarah taarī hai apnī bastiyoñ meñ ab

ki ik patte kī jumbish peḌ kī guftār ho jaa.e

amīr-e-shahr kī nīñdeñ na uḌ jaa.eñ to tum kahnā

tumhārā ek bhī sapnā agar bedār ho jaa.e

sabhī se itnī lekin qurbateñ vo chāhtā kyoñ hai

ki koī sāmne aa.e to bas takrār ho jaa.e

kisī kī rahbarī 'bebāk' ham se kis tarah hogī

na jaane kab hamārī fikr ḳhud-muḳhtār ho jaa.e

hamara dil hi dariya ki agar manjdhaar ho jae

to kashti KHwahishon ki Dub kar bhi par ho jae

mile khul kar sabhi se aur phir bezar ho jae

to jina aise dil ke sath ek aazar ho jae

hamein raat aur din ki kashmakash achchhi nahin lagti

agar ye bhi na ho to zindagi be-kar ho jae

KHamoshi is tarah tari hai apni bastiyon mein ab

ki ek patte ki jumbish peD ki guftar ho jae

amir-e-shahr ki ninden na uD jaen to tum kahna

tumhaara ek bhi sapna agar bedar ho jae

sabhi se itni lekin qurbaten wo chahta kyon hai

ki koi samne aae to bas takrar ho jae

kisi ki rahbari 'bebak' hum se kis tarah hogi

na jaane kab hamari fikr KHud-muKHtar ho jae